ეპოქის კულტურულ-ისტორიული დოკუმენტი (ოლივერ უორდროპისა და არტურ ლაისტის წერილები ივანე მაჩაბელს)
Resumen
ივანე მაჩაბელს XIX საუკუნის ქართველ მოღვაწეთა შორის საპატიო და განსაკუთრებული ადგილი უკავია. იგი იყო მრავალმხრივი მოღვაწე – მთარგმნელი, პუბლიცისტი, ჟურნალისტი, ქართველთა შორის წერა-კითხვის გამავრცელებელი საზოგადოების დამფუძნებელი და მდივანი, ჟურნალ „ივერიისა“ და გაზეთ „დროების“ რედაქტორი, „ვეფხისტყაოსნის“ ტექსტის დამდგენი კომისიის წევრი და გიორგი ქართველიშვილისეული გამოცემის რედაქტორი 1888 წელს.
ივანე მაჩაბლის ბიოგრაფიის – ლიტერატურული მემკვიდრეობისა და საზოგადოებრივი საქმიანობის საკვლევად განსაკუთრებით მნიშვნელოვანია ხელნაწერი წყაროები. ეს მასალა სანდო დასაყრდენია ქართული მწერლობის, თარგმანის ისტორიის, საზოგადოებრივ-კულტურული, ეკონომიკური თუ ქართულ-უცხოური ლიტერატურული ურთიერთობების შესასწავლად.
გიორგი ლეონიძის სახელობის ქართული ლიტერატურის სახელმწიფო მუზეუმში და ოქსფორდის ბოდლეის ბიბლიოთეკაში დაცული ივანე მაჩაბლის სამი ფრანგული და ოლივერ უორდროპის ექვსი ფრანგული წერილის თარგმანი დაიბეჭდა 1984 წელს. საარქივო მასალის შესწავლის შედეგად, ლიტერატურის მუზეუმში აღმოჩნდა დღემდე გამოუქვეყნებელი ფრანგულენოვანი წერილები – ოლივერ უორდროპის ორი წერილი ივანე მაჩაბლისადმი და არტურ ლაისტის ექვსი წერილი ივანე მაჩაბლისადმი.
ეს წერილები დასტურია იმისა, თუ რა ახლო ურთიერთობა ჰქონდა ივანე მაჩაბელს ოლივერ უორდროპთან და არტურ ლაისტთან, რომელიც, პირველ რიგში, ქართული კულტურის ინტერესებიდან გამომდინარეობდა. თავის მხრივ, როგორც ამ ეპისტოლეებიდან ჩანს, ინგლისელიცა და გერმანელიც უანგაროდ იყვნენ შეყვარებული საქართველოზე. ეს ახლად აღმოჩენილი ფრანგულენოვანი წერილები იძლევა ეპოქის კულტურული ვითარების მკაფიო სურათს და სწორედ ამით არის ფასეული.
საკვანძო სიტყვები: საარქივო კვლევები, ხელნაწერები, მიმოწერა, ივანე მაჩაბელი, ოლივერ უორდროპი, არტურ ლაისტი











